تكبيرة الثوره

بكره العيد

كل سنه وانتم طيبين

حبيت أحكيلكم عن اول تجربه في الخير ليا

النهارده شاركت في يوم الكساء مع جمعية رساله

بعيدا عن الاخلاق اللي اكتسبتها النهارده

في موقف أثر فيا أوي

كان في ست كبيره مصره انها تاخد طرحه سودا

والمرافق اللي معاها تعب لحد ما لقالها واحده بعد ما جابهالها

قالتله : “ ربنا يبارك فيك يبني انا كان لازم اخد الطرحه النهارده لاني معنديش غير الطرحه اللي لبساها دي وبلبسها بقالي تلات سنين وكنت وخداها برده من رساله “

الست دي خرجتني من القوقعه اللي كنت عايشه فيها وخلتني اردد الحمد لله لحد ما روحت

مش هيا بس كان فيه حالات كتير بجد محتاجه بس الطيبه المصريه اللي شفتها في وش الست دي أسرتني

واكتر حاجه كانت بتريحني هيا البسمه على وش الاطفال لما بيلاقو حاجه حلوه تعجبهم

اتعلمت النهارده من ناس كتير طرق تعامل واخلاق ومبادئ حلوه اوي

وعرفت اد ايه انت ممكن تأثر في غيرك ببسمه عالشفايف وكلمه حلوه

بجد بنصح أي حد كان بيكسل زي حالاتي كده يجرب ولو مره ويقرر بعدها هيشارك ولا لا

من شويه في المسجد اللي جنب بيتنا اشتغلت التكبيرات

حسيتها اوي …. أمّال … دي اول تكبيرة عيد بعد الثوره

متحمسه للتكبير في وسط زحمة الصلاه أوي

الله اكبر الله اكبر الله اكبر لا اله الا الله
الله اكبر الله اكبر ولله الحمد

الله اكبر كبيرا والحمد لله كثيرا وسبحان الله بكرة واصيلا ولا اله الا الله وحده صدق وعده ونصر عبده وعز جنده وهزم الاحزاب وحده لا اله الا الله ولا نعبد الا اياه مخلصين له الدين ولو كره الكافرون

كل سنه وانتم طيبين

كل سنه ومصر سالمه لينا